Nuuk TV Kalaallit Nunaanni TV-qarfiit annersaraat, inoqutigiit 3000-it sinnerlugit ilaasortaralugit. Tassa illoqarfiit annersaanni inoqutigiit 60 procentiisa missaat.

Nuuk TV-p takorluugaa: "Inuiaqatigiinnut tusagassiortutut, eqiingasuullutalu oqallisaarisoorusuppugut".

Nuuk TV-p anguniagaa: "Politikkikkut aningaasatigut tunaartaqarnani, TV-mik aallakaatitassiorsinnaaneq aallakaatitsisinnaanerlu."

Nuuk TV-mi ilaasortat digitalimik TV-kkut kanaalit 23-it tungaanut isiginnaarsinnaavaat, radiokkullu kanaalit arfineq pingasut tusarnaarsinnaallugit.

Kanaalit tamangajammik akunnernik sisamanik siuaqqapput. Taamaattorli assersuutigalugu CNN toqqaannartumik aallakaatinneqartarpoq.

Nuuk TV- nammineq aallakaatitassiai Nuummiunit tamanit isiginnaarneqarsinnaapput, analogimik digitalimillu taakku ingerlanneqarput.

Nuuk TV illoqarfiup iluani aallakaatitassiortarpoq, illoqarfiullu iluani nutaarsiassanik, timersornermik nipilersornermillu aamma aallakaatitassiortarluni.

Nutaarsiassat internet-imut inissinneqartarput, taamaalillutillu illit nammineq piffissaqaleraangavit takunissaannut periarfissaqarputit. Aammattaaq Nuuk TV-p toqqorsivianiit aallakaateriikkat takusinnaavatit.